楊秀卿女士的唸歌人生
楊秀卿女士是昭和九年（1934）十一月二十六日出世，血跡地（出生地）是台北城文山郡新店街的屈尺，爸母是手面趁食的散赤人。佇四歲時感著風寒，無錢看西醫，只是服用赤跤仙仔的藥方，誤了症頭，煞來兩蕊目睭失明。
伊的養爸為伊前途設想，佇伊九歲時陣，將伊送予桃園的唸歌藝人邱鳳英（邱查某）做養女，學彈琴唸歌的生活技藝。但是師徒緣淺，一年後，邱鳳英就將楊女士送回楊家。
轉來無偌久， 養爸又閣將伊送予另外一位基隆的唸歌藝人蕭陳阿現做養女， 猶原是學彈琴唸歌的生活技藝。蕭陳阿現本成就有收一養女徒弟蕭腰（蕭金鳳），伊比楊女士大六歲，嘛是失明的人。就按呢，蕭女士將伊彈琴唸歌的技藝全部傳予伊。
經過三年四個月的苦學苦練 ，伊學藝有成，行入走唱之路， 彼時是是終戰前後。兩姊妹做陣來到茶樓、廟口、酒家、公園等所在彈唱賣藝。
十四歲時，伊的倒跤生出腿頭膿，嘛是因為醫治耽誤，煞著開刀手術，變成長短跤，命運真是創治人啊！毋過自伊長短跤了後，人做一下精光（靈光）起來，琴藝進步，記歌詞的功力嘛是大大精進。人講天兵時駛得過，富袂退（大難不死，必有後福），大概就是按呢。
到1950年代，中國勢力溢入台灣，一寡茶樓酒店由中國人接手，遮的人聽無台語，就毋准伊入去走唱趁食，伊彼時佮一寡歌仔先仝款，藝精人貧，開始一段度小月的時間。
天無雨，人無步， 楊女士只好佮製藥廠合作，佇都市的公園底、市場口，抑是庄跤的大樹跤、大廟埕，伊佮翁婿楊再興先生「婦唱夫隨」，翁某唸歌唱曲，招集人客，中途才換藥廠頭家來推銷藥品，閣也予伊行出一條生路，伊的走唱跤跡就伐出基隆地界，行遍全台灣。摘戲點歌-----略
|
沒有留言:
張貼留言